دنيا جي عظيم جنگين مان پهرين مهاڀاري جنگ 1914ع جي اونهاري کان 1918ع جي سياري جي وچ ۾ لڳي ، جنهن جو فوري سبب آسٽريائي تخت جي وارث ’فرانز فرڊيننڊ‘ جو قتل هو، پر اصل محرڪ يورپي سامراجي طاقتن وچ ۾ وڌيڪ بيٺڪون هٿ ڪرڻ جي بک هئي. هيءَ جنگ ”اتحادين“ يعني فرانس، برطانيا، آمريڪا، اٽلي، جاپان، بيلجيم، سربيا، رومانيا، يونان، پورچوگال، مانٽينيگرو ۽ روس وغيره ۽ ”محوري طاقتن“، يعني جرمني، آسٽريائي/هنگريائي سلطنت، بلغاريا۽ تُرڪيءَ جي وچ ۾ وڙهي وئي. جنهن ۾ ڪل 70 لک فوجين (60 لک يورپي فوجين سميت) حصو ورتو انهن مان 9 لک مارجي ويا، جڏهن ته 12 لک زخمي ٿيا. جنگ جي شروعات آسٽريا پاران سربيا تي قبضي سان ٿي، بعد ۾ جرمنيءَ لڪسمبرگ ، بيلجيم ۽ فرانس تي قبضي ۽ روسي جوابي حملي سان لڙائيءَ ۾ اضافو ٿيو. 1914ع ۾ عثماني سلطنت ۽ 1915ع ۾ اٽلي، بلغاريا ۽ رومانيا طرفان جنگ ۾ شموليت سان جنگ وڌيڪ تيز ٿي. نيٺ 11-نومبر 1918ع تي آمريڪي فوج جي سهڪار (Central Powers )سان ’اتحادين‘ هٿان جرمن فوج کي شڪست ملڻ بعد، چئن سالن جي ڊگهي ويڙهه کان پوءِ اتحادين کي سوڀ نصيب ٿي. پهرين عالمي جنگ دُنيا ۾ هڪ طرف زبردست تباهي آندي، ته ٻئي پاسي عثماني ۽ آسٽريائي/ هنگريائي سلطنتن جو خاتمو، روس ۾ ڪميونسٽ انقلاب، ورسيلز جو معاهدو ۽ ’قومن جي مجلس‘ جو قيام عمل ۾ آيو. ان جنگ سبب لکين ماڻهو مارجي ويا، لکين بي گهر ٿيا، اربين ڊالرن جي ملڪيتن جو نقصان ٿيو ۽ يورپ ۾ جنگي ماحول جڙيو. جنهن جي نتيجي ۾ اڳتي هلي ٻي مهاڀاري لڙائي لڳي